СООПШТЕНИЕ ЗА ЈАВНОСТ

Скопје, 20 март 2019г. – Дел од  медиумите денес пренесоа информација дека Државната комисија за спречување на корупцијата отворила предмет за две вработувања во Агенцијата за аудио и аудиовизуелни и медиумски услуги кои се случиле за време на изборен процес. Во насока на објективно и аргументирано информирање на јавноста, а почитувајќи ги принципите на транспарентност и отчетност во своето работење, Агенцијата ја информира јавноста за следново:

Согласно Изборниот законик, Агенцијата за аудио и аудиовизуелни медиумски услуги е должна да го следи изборното медиумско претставување од денот на распишување до завршувањето на изборите. Имајќи го предвид бројот на радиодифузери, Агенцијата нема ни приближно доволно човечки ресурси за спроведување на надлежностите и обврските утврдени со Изборниот законик, поради што години наназад за време на изборни циклуси ангажира надворешни соработници за мониторинг на програмите како и за изготвување мерки за констатираните прекршувања – на пример, за време на локалните избори 2017 беа ангажирани 24 лица, од кои 3 правници. Соработниците се ангажираат преку Агенција за привремени вработувања, врз основа на утврдените потреби и барања од секторите во Агенцијата чија работа е поврзана со изборните процеси. Работниот ангажман на овие соработници е со ограничено времетраење, односно до завршување на активностите на Агенцијата поврзани со изборите.

Што се однесува до „двете вработувања во Агенцијата за аудио и аудиовизуелни и медиумски услуги (АВМУ) кои се случиле за време на изборен процес“, потврдуваме дека врз основа на претходно поднесено барање од Секторот за правни работи, ангажирани се двајца правници. Воедно, информираме дека откако беа распишани изборите на 8 февруари, ангажирани се и 7 соработници за мониторинг на програмите, додека по отпочнување на кампањата на 1 април дополнително ќе бидат ангажирани уште 15-тина соработници.

Ваквиот ангажман е во согласност со Изборниот законик, кој предвидува дека може да се започнуваат постапки за вработување, во случај на итни и неодложни работи. Потврда за ова се и претходно доставените мислења од Државната комисија за спречување на корупцијата дека нема законска пречка Агенцијата за аудио и аудиовизуелни медиумски услуги да ангажира надворешни соработници за мониторинг и за изработка на прекршочни постапки за време на избори.

Агенцијата и стои на располагање на ДКСК и ќе и ја достави потребната документација, веднаш откако истата ќе биде побарана.

 



Accessibility

Accessibility