Хроника од 2-та седница на Советот на Агенцијата
Скопје, 07.07.2025 – Советот на Агенцијата за аудио и аудиовизуелни медиумски услуги, на денешната седница, донесе повеќе одлуки и заклучоци од доменот на медиумската регулатива и планираните активности на Агенцијата.
Советот усвои Одлука за одобрување на ребаланс на Финансискиот план на Агенцијата за 2025 година. Вкупно планираните расходи остануваат на досега утврденото ниво.
На седницата беа разгледани извештаи од извршени програмски надзори и донесени следниве одлуки:
- На АЛТРА-САТ 2000 ДООЕЛ Охрид ѝ е изречена мерка јавна опомена за прекршување на член 141 став 13 од Законот за аудио и аудиовизуелни медиумски услуги, поради реемитување програмски сервиси без соодветна потврда за регистрација. Субјектот е задолжен веднаш по приемот на Решението да го усогласи своето работење.
- Јавни опомени се изречени и на ТРД ТВ М Арнаудов Михајло Охрид ДООЕЛ и ТРД ТВ студио ТЕРА Манговски Зоран Битола ДООЕЛ, поради неправилна примена на предупредувачка сигнализација за програми од втората категорија, спротивно на член 50 став 3 од Законот и членовите 20 и 21 од Правилникот за заштита на малолетни лица. Радиодифузерите се задолжени да го усогласат работењето во рок од 20 дена од приемот на решението.
Советот даде одобрување за спроведување на постапки за јавни набавки за следниве предмети: Организација на Денови на медиумска писменост 2025, Лиценца за Firewall, Дигитални сертификати и Истражување и анализа за родови прашања и застапеност на жените и мажите во програмите на радиодифузерите
Сите набавки се предвидени со Годишниот план за јавни набавки за 2025 година, а средствата се обезбедени со Финансискиот план на Агенцијата.