Скопје, 27.10.2026 година – Советот на Агенцијата за аудио и аудиовизуелни медиумски услуги на денешната 36. седница донесе одлуки за продолжување на дозволите за радиоемитување на Радио Антена 5 ДОО Скопје, Радио Канал 77 Штип, Радио Кочани ФМ ДОО Кочани, Мапедито-радио Мефф ДООЕЛ Прилеп и Радио Фортуна Виолета ДООЕЛ Скопје, како и за продолжување на дозволата за телевизиско емитување на Трговското друштво за радиодифузна дејност Спектра, општина Лабуништа ДООЕЛ. Дозволите се продолжуваат за период од девет години, од 5 јануари 2027 до 4 јануари 2036 година.
Во делот на програмскиот и административниот надзор, на ТРД ТВ Дуе Назми ДООЕЛ Гостивар му беа изречени две мерки јавна опомена. По извршениот програмски надзор, утврдено е дека на 4 септември 2026 година телевизискиот програмски сервис не ја исполнил обврската за емитување најмалку 30% програма изворно создадена како македонски аудиовизуелни дела, со што го прекршил член 92 став 1 од Законот за аудио и аудиовизуелни медиумски услуги. Со извршениот административен надзор, за истиот датум, утврдено е дека во дел од емитуваните програми не биле објавени податоците за импресумот на соодветно место за секоја посебна програмска содржина, што претставува прекршување на член 14 од Законот за медиуми. На телевизијата ѝ е наложено во рок од 20 дена од приемот на соодветните решенија да го усогласи работењето со законските одредби. По истекот на роковите, Агенцијата ќе изврши контролни надзори за да утврди дали е постапено по изречените мерки.
