Shkup, 3 nëntor 2026 – Agjencia për Shërbime Mediatike Audio dhe Audiovizuele kreu mbikëqyrje ndaj emisionit „Pod lupa“, të transmetuar në TV Alfa më 2 nëntor 2026, me temën „Shpërbërja e familjes maqedonase: Mes dhunës, divorceve dhe përplasjes së traditës me kohën moderne“. Në emision morën pjesë Petar Bogojevski, kryetar i partisë „Koncepti Maqedonas“, dhe Katerina Koteska, avokate e specializuar për të drejtën familjare dhe dhunën në familje.
Agjencia thekson se çdo pjesëmarrës në një debat publik, veçanërisht personat publikë, mban përgjegjësi personale për qëndrimet e shprehura publikisht dhe mesazhet që u përcjell qytetarëve. Nga ana tjetër, roli i gazetarisë profesionale është të hapë çështje me interes publik, të mundësojë debat të argumentuar dhe të shqyrtojë në mënyrë kritike pretendimet e paraqitura, me qëllim që publiku të marrë informacione relevante dhe të formojë në mënyrë të pavarur mendimin e tij.
Në rastin konkret, nga aspekti rregullator, gazetarja që drejtonte emisionin veproi në përputhje me standardet profesionale të gazetarisë. Ajo parashtroi pyetje relevante, vuri në pikëpyetje pretendimet e shprehura dhe kërkoi sqarime shtesë për to.
Njëkohësisht, Agjencia dënon qëndrimet e Petar Bogojevskit, me të cilat relativizohet dhe arsyetohet dhuna ndaj grave dhe fëmijëve, promovohet pozita e tyre e nënshtruar dhe tentohet që pikëpamje të tilla të paraqiten si vlera tradicionale. Mesazhe të tilla janë të papranueshme dhe janë në kundërshtim me parimet themelore të respektimit të të drejtave të njeriut, barazisë dhe dinjitetit njerëzor.
Dhuna, poshtërimi dhe pabarazia nuk janë vlera tradicionale dhe nuk mund të arsyetohen me asnjë pretekst. Veçanërisht e papranueshme është që dhuna fizike ndaj fëmijëve të paraqitet si mënyrë e pranueshme e edukimit, apo dhuna ndaj grave si pjesë normale e marrëdhënieve familjare.